جهاز اختبار الليدات بيمكنك انك تجرب مساطر الليدات
ممكن تجرب ليد ليد أو ممكن تجرب المسطرة كاملة او المساطر كلها...
الجهاز بيدخل له 5 فولت وبيطلع حوالي 230 فولت دي سي
لكن لو وصلته على ليد 1.6 فولت... الليد بيسحب من الدايرة ال1. 6 من غير ما يتحرق
ولو وصلته على دايرة ليدات بتسحب 40 فولت الليدات هتسحب من الدايرة ال40 فولت وهكذا
الدائرة دي بتسخدم في صيانة التليفزيونات الليد واللمبات الليد وفيه اجهزة لاختبار الليدات بتتباع بأسعار مبالغ فيها
دي الدائرة أنا اختبرتها وعملت الجهاز عليها.... فأي حد عايز ينفذ جهاز زي ده... الدائرة دي أنا مجربها
بمجرد ما بتوصل عليه ليد بيسحب الليد الفولت اللي المصنع عامله.
المطلوب:
1.موسفيت k2738 موجود عند انور الجمال سعره 35 جنيه
2.مقاومة 4.7 اوم 5 وات. 3 جنيهات من عند الأمير
3.دايود 1n4007( لو لقيت دايود 3 أمبير يبقى أفضل) وأي دايود بتاع بريدج توحيد ينفع سعره 1 جنيه
4.مكثف 10 ميكروفاراد و250 فولت تمنه 1 جنيه
5.ملف قلب فاريت 18 لفة (انا استخدمت ملف من باور سبلاي وفكيته لغاية اما وصلت ل18 لفة
وبعدين جبت سلك معزول 0.2 ملي او 0.3 او 0.4 ملي.. مش فارقة... ولفيت 10 لفات عكس اتجاه اللف بتاع الملف الأول.
6.سويتش on/off عشان يفتح بوابة الموسفيت عن طريق ايصالها بالطرف الموجب للبطارية من خلال الملف ال10 لفات اللي متوصل على موجب البطارية وملفوف عكس اتجاه لف الملف ال 18 لفة اللي رايح للدرين drain بتاع الموسفيت.... او لو عايزه يوصل الكهربا ويقطعها يعني يبقى على الدخول برضه تمام... بس انا عامله يفتح البوابةgateبتاعة الموسفيت
ركز..... الملف ال18 لفة انا لافف عليه ملف 10 لفات عكس اتجاه الف بتاع الملف ال18 لفةومتوصلين ببعض من ناحية الطرف الموجب لكن من الناحية التانية الملف ال18 لفة متوصل بدرين drain الموسفيت بينما الملف ال10 لفات متوصل ببوابة gate الموسفيت
وفي نفس الوقت درين الموسفيت متوصل بموجب الدايود وسالب الدايود هيتوصل بموجب المكثف وبعد المكثف هنوصل المقاومة ال5 وات ويخرج من وآخر المقاومة الطرف الموجب بتاع الاختبار
بينما سالب البطارية متوصل بسورس source الموسفيت بسالب المكثف ويخرج الطرف السالب بتاع الاختبار
العلبة بقى والبلج و بيت البطارية الليثيوم 18650 وغيره دي تفاصيل كل واحد ودماغه يعني ممكن تضيف شاشة افو فيها امبير ويبقى بيديك الفولت وسحب الأمبير
انا بالنسبة لي معنديش شاشة افو حاليا كل الشاشات راكبة في مشاريع... فانا قدمت لكم الدائرة الأساسية وكل واحد يحط التاتش بتاعه😊
مثلا انا لقيت انه يتشغل على الباور سبلاي احسن لانه بيستنفذ البطارية بسرعة جدا لأنه على 5 فولت بيسحب حوالي 1.5 أمبير
اما الباور سبلاي فبيقدر يتعامل بكل سهولة.
من العيوب: انه لما الجهد ال dc بيبقى عالي فممكن يصعقك
