(ازاي موبايلات فيها نظام تبريد؟!) (يعني ايه نظام تبريد؟) (بيشتغل ازاي؟)
تعالي هنا يا معلم عشان اشرحلك..
نظام تبريد الموبايل حاجه بسيطه جداً ورخيصه..تكمن تكلفتها في النحاس مش اكتر.
بس..فهو عباره عن انابيب نحاس متشكله بطريقه معينه فيها "ماده سائله"، بدايته هي الـEvaporator و هو ده الجزء اللي بيبقي فيه السائل وبيبقي راكب عالبروسيسور فبيبتدي يسخن لما البروسيسور بيسخن و يخلي السائل يغلي و يتبخر.
و حسب المقوله الشهيره لدي مدرسين الفيزيا (السخن بيدي الساقع) فالسائل ده بيهرب من السخونيه و يروح للمناطق الاقل حراره في نظام التبريد عن طريق الـVapor line و بيستقر شويه في اكبر حته في النظام و هي الـThermal Diffusion Plate و دي بتبقي راكبه علي معدن الجهاز نفسه "بطريقه الـheat sink" والمعدن متوصل بإطار الجهاز الخارجي اللي بيبقي اقل حراره...
فبالتالي الحراره بتتوزع و السائل المتبخر بيبتدي يتكثف تاني ويبرد و يرجع لحالته السائله، فيروح للبروسيسور عن طريق الـliquid line "المكان الاقل حراره في النظام" و لما يوصل بيبرد البروسيسور و يبتدي ياخد الحراره منه تاني و يغلي و يتكثف.. وهكذا،،
في شركات دلوقتي بتستخدم "مروحه" جوا الجهاز و برا الجهاز لتقليل افضل للحراره 😃
