لصق قشرة الخشب؟
موضوع لزق قشرة الخشب
القشرة هى طبقة رقيقة من الخشب الطبيعى تخانتها اقل من 1 مم تأتى على شكل لِفف طولها يصل الى عدة امتار وعرضها كيفما اتفق حسب قطر الشجرة المأخوذة منها . ومنها انواع تصنع من الخشب الطبيعى ايضا لكنها من تجميع عدة انواع من الخشب بألوان متباينة ثم قطعها فى صورة طبقات مثل القشرة الزبرانو وهى رائعة الجمال لكنها تتشقق بسهولة جدا ومتعبة جدا فى لزقها ولا انصح المبتدئ بالبداية بها .
والقشرة عموما تأخذ شكل ثمارة ولون الخشب المأخوذة منه ولها اشكال غاية فى الجمال سبحان من ابدعها وتعطى للمنتج الملزوق بها فخامة عظيمة وثراء . ولو كان اللزق جيدا ودقيقا وفيه فن فهى تدوم طويلا ولا تفقد رونقها ابدا ولا تمل من النظر والتأمل فيها .
ولصق القشرة من فنون النجارة التى لا يعرفها كل النجارين مهما كانت خبرتهم طويلة
وأنواع القشرة لا اعرف حصرها لكنى سوف اتكلم فقط عن الانواع التى تعاملت معها بيدى وهى الشائعة فى السوق المصرى وهى الارو والبلوط والبليسندر والجوز التركى والزبرانو والماهوجنى ومرفق لهم صور توضح اشكالهم بصفة عامة
واول خطوة فى مشوار لزق القشرة هى شرائها وللاسف معلوماتى عن اماكن البيع والاسعار قديمة جدا لذلك ارجو من اى أخ يعرف مكان لبيعها او اسعارها الحالية ان يتكرم بمساعدتنا جميعا بمعلوماته .
وانت بتعمل حساباتك لما تحتاجة من القشرة لازم تعمل حسابك على نقطة مهمة وهى ان القشرة الملزوقة تكون قوية جدا وتشد قطعة الخشب التى تحتها وتتسبب فى تقويسها الا اذا لزقتها من الجانبين يعنى مينفعش تلزقها وش واحد وكانوا يلزقون الوجه الغير ظاهر بنوع ارخص وكان وقتها الموجنا (الاسم الشائع للماهوجنى) .
ولما تحسب الكمية لازم تعمل حسابك انها عند لزقها يتم تركيب أطراف الشرايح على بعضها ويتم رفرفة الاطراف الى خارج قطعة الخشب من الاجناب وفوق وتحت حتى يتم قطعها بعد ذلك بالضبط على مقاس القطعة يعنى تعمل حسابك فى زيادة حوالى10% .
ولما تنزل تشترى دقق فى اختيار القطع من شجرة واحدة علشان تعرف تخاويها كما يقال ودقق ايضا فى الا تكون مكرمشة او بها ثقوب او مشلوعة الاطراف او متشققة . وهاكم بعض الصور للتعرف على الانواع المذكورة التى اعشق منها البليسندر اذا اخذ استر اسود غاية فى الفخامة والوقار.
ويالهوبالى بقى على البلوط لو خد جملكة بيضاء من محترف ( انا شخصيا مجربتهاش وجبت استرجى يعملها) جمال ربانى بديع. ولا متقوليش على الجوز التركى وجماله وعزه وفخامته . وياخراشى ياخراشى على الزبرانو وزهزهته وحلاوته . والارو تحس انه شخصية محترمة جدا شيك جدا متزنة جدا غنية جدا
بس انا مكسوف منكم ومحرج جدا لانه لم يتيسر لى الحصول على قطعة قشرة اقوم بلصقها وتصوير العملية ويارب قريبا اتمكن لكنى عملت حركة يمكن تكون قرعة بالنسبه لكم لكن اعذرونى واعتبروها جهد المقل وهى انى مثلت بفرخ ورق كأنه فرخ قشرة وكانى باشتغلها ومش قصدى اشتغلكم انتم لكن كان الزام على اوفى بوعدى لاحبائى واتأخرت عليهم واضطريت لكده فسامحونى واقبلوها من ولن اقصر فى الشرح باذن الله :
اول خطوة بتسمبك اى مسامير مدقوقة فى الشغلة وبعدين تمشطها بالفارة المشط زى اللى فى الصور وهى فارة خشب عادية لكن زاويتها واقفة شوية وكستيرها شبه العادى لكن ضهره بيكون مشرشر ولازم صلبه يكون محترم يعنى ماركة زى الاستانلى او البيجو علشان مش كل جبدتين تحتاج سنها واللى فى الصورة ده بيجو فرنساوى قديم مفخرة اتسن3 مرات فى37 سنة وشغال وعملية التمشيط دى مهمة جدا لانها بتضاعف مساحة سطح التلامس بين الخشب وبين القشرة . وفيه ناس بتمشط بمبرد خشابى بس شتان بين الاتنين المبرد والفارة المشط وهى كمان بتقوم بتسوية السطح لوفيه عالى وواطى .
انت هتلزق القشرة بكرة الصبح ان شاء الله النهاردة بالليل تستفها وترصها بنظام اللى هيتلزق الاول يبقى فوق وبعديها الكمالة بتاعتها ثم اللى بعديها وهكذا وبتخاوى الحتة مع كمالتها يعنى بتحطهم جنب بعض وتشوف رسمة ثمارة القشرة لو نصف دايرة تشوف النص التانى بتاعها لو خطوط متوازية تجيب الخطوط المتوازية اللى زيها وتكملها لو خطوط مايلة يبقى تشوف الحته المناسب اللى فيها نفس الميل او عكسه بحيث تعمل شكل جميل وبتراعى ان لو درف دولاب جنب بعض بتخليهم زى بعض او تخليهم سيميترك يعنى اللى فى اليمين زى اللى فى الشمال . والمخاوية دى هى التكة الفنية اللى فى لزق القشرة وهى اللى بيبان فيها القشرجى فنان وذوقه عالى ولا بتاع قص ولزق . وهى اللى بتطلع قطع موبيليا تحف ويندفع فيها فلوس جامدة . خاويتهم كلهم وستفتهم بتجيب لوح زجاج او بلاستك او خشب وتفرش عليه مشمع وتبلهم ميه كلهم واحده واحدة وتحطهم على اللوح ده بنفس تستيفتهم اللى انت عاملها واحدة فوق التانية وفوقهم جرنال كامل مبلول وتحط عليهم مشمع تانى ولوح خشب واى حاجة تقيله وروح نام وسيبهم للصبح بالشكل اللى حضرتك شايفه فى الصورة ده بس انا مطلعهم برة شوية علشان يبانوا
لزق القشرة
حضرتك ياريت تبيت الغراء كمان فى المية بتاعته . الغراء المستخدم افضل حاجةهى الواح الغراء الجيلاتين وبتكون رقيقة وشبه شفافة واغلى شوية لكن الشائع استخدامة هو الغراء الحمص ويستحسن تبص فيه ميكونش فيه اى شوائب بتنقعه طول الليل والصبح تحطه فى حمام مائى على النار (مهم جدا حمام مائى )عمر الغراء ما يتسيح على نار مباشرة يتحرق ويحل . واحسن حاجه ليه هو الغراية زى اللى فى الصورة بس تتابعها احسن الميه تتبخر وكل شوية تزودها .
اهم حاجة فى شغل القشرة ان الغراء يكون باستمرار فى اعلى درجة حرارة ممكنه يعنى لو تقدر تخلى النار جنبك وانت شغال وعليها الغراية يكون احسن لان الميكانيزم بتاع اللزق هو ان الغراء الساخن جدا بيدخل فى مسام الخشب وفى مسام القشرة ويعمل ملايين الجذور بتربط السطحين لا يمكن يتفكوا تانى ولا بعد قرون من الزمن . وفيه فعلا فى اوروبا قطع موبيليا ملزوقه من القرن 18 و 19 بتتباع بملايين كتحف للاثرياء . حضرتك بتحط الفرشاه الكبيرة فى الغراء على النار دقائق علشان تسخن وتنزل بالغراء وهو مولع على الخشب تدهن بسخاء وتدعك الفرشة باخلاص علشان تشرب مسام الخشب وكله فى السريع ابو سريع قبل ما يبرد تجيب اول حتة قشرة انت محضرها ومستفها ضرورى علشان الوقت عنصر قاتل فى نجاح الشغل . وتحطها مقلوبة على الغراء المدهون مقلوبة يعنى ضهرها ليك ( بالمناسبة القشرة ملهاش وش وضهر كله واحد بس حسب تستيفك انت) وفى السريع القوام بتدهن الضهر ده وش غراء ساخن بسخاء برضه ودعك الفرشاه . وبسرعة بتقلبها على وشها وتظبطها مكانها بحيث يكون فيه رفرفة من 3 جوانب وطبعاالقشرة غالبا بتكون كنزة عن الدرفة وبتلزقها على مرحلتين وتنزل عليها بقى بشاكوش القشرة المخصوص اللى انت شايفه فى الصور وهو بيتعمل من النحاس ولازم تعمله يد محترمة تريحك وتستحمل الضغط وتمسكه بنفس الطريقة اللى فى الصور وتضغط عليه وتسوق الغراء اللى فوق واللى تحت لغاية ما يخرج كله وتحضر اى علبه تحط فيها الغراء اللى طالع وخلى بالك فى البداية القشرة الغرا تحتها كتير وهتتزفلط وتتحرك من مكانه اظبطها اول باول وسايسها لغاية ما تثبت تحت الشاكوش ... تفضل على كدة تضغط وتسوق الغراء لغاية متحس ان الغرا اللى بين القشرة والخشب خرج كله ولو سيبت غراء بينهم ولو طبقة بسيطة تعيب الشغل وتنطر تانى هو المطلوب بين الطبقتين فيلم من الغراء لا يرى وجذور الغرا اللى فى مسام الخشب ملتحمة فى جذور الغراء اللى فى مسام القشرة .... كده انت خلصت نص الدرفة ....
بتدهن النص التانى بنفس الطريقة والغرة جايبه من على النار وتحط الحتة التانية( الكمالة) مقلوبه برضه وتدهنها وبعدين تقلبها وتظبطها مع اختها الملزوقة حسب ما انت راسم فى دماغك الرسمة ولازم تركب طرف الجديدة فوق طرف الملزوقة بعلى الاقل 2 سم وركزمعايا فى قصة اللحام دى هى اللى بتنجح الشغل او تسقطه ... وادهن غرا وانزل بنفس الطريقة بالشاكوش وزيح كل الغرا من فوق وتحت .... كله وركز اوى على مناطق اللحام والاطراف وعلى القلب كمان متسيبش اى غرا . خلاص لزقت بقيه الدرفه واللحام راكب على بعضه بص فى الصور على سكينة القشرة كنا زمان بنعملها زى ما انت شايف من حتة صفيحة منشار ونشكلها دوران ونشرشرها ونسنها على الجلخ وبعدين مسن زيت وتطلع كما تراها والصنايعية دلوقت بيستسهلوا الكتر ويمكن ميعرفوهاش كمان هى اكفأ من الكتر ومملوكة وعمرها ما تاخدها ثمارة الخشب وتخرج بيها عن مسار المسطرة والكتر بيعمل كده ولو حته عقرت معاك وانت بتقطع القشرة مش بتقعد رايح جاى زى الكتر فيخليها تشلع لكن بتضغط عليها مكانها وتحركها على الدوران بتاعها تقطع الحته المعقرة فى سلام وحضرتك بقى بتكون محضر مسطرة الومنيوم احسن من الخشب والحديد زى اللى فى الصور بتثبتها بالضبط فى وسط ركوب اللحام ( انت مركب 2 سم فوق على 2 سم تحت بتسنترها على 1 سم من طرف اللى فوق وتقطع بثبات وضغط وتشيل الحته اللى فوق ترميها وترفع طرف اللى فوق هتلاقى اللى تحت مقطوعة برضه تطلعها بشياكة وحرفنة وترميها وعلى طول تدهن اللحام غرا سخن وتنزل ضغط بالشاكوش وتشيل كل الغراء وتكون محضر ورق لزاق من اللى كنا بنلزق بيه زمان جلاد الكراريس فى ابتدائى لو معرفتش تجيبه حضر شريط ورق عادى بطول اللحام وعرض 3 سم الزقه بسرعة على اللحام كله ووش غرا سخن فوقيه تانى وشيل الغرا برضه بالشاكوش . كده انت ولد مفيش زيه فى ال90 مليون مئات معدودة . بس لسه اصبر مخلصناش انا قلتلك انها تهد الحيل ومش سهلة وصنعة عميقة بس الانجاز فيها انجاز حقيقى . هتقلب الدرفة على وشها وتقطع الرفرفة بالسكينة وانت ساند على حرف الدرفة بالكتر واعدلها تانى والزق الحروف بورق لزاق بنفس الطريقه .
لسه يا حبيبى مخلصناش لازم تلزق الوش التانى للدرفة بنفس الطريقه فى نفس الوقت لان الخشب بيتعرض لتسخين وممكن يلف والغرا لما بينشف بيشد الدرفة بقوة وممكن يقوسها ولو لزقت الوش التانى بيوزن الشد من الناحيتين . كده احنا خلصنا مرحلة اللزق ولسه كمان مرحلتين اتفرج على الصور وسقم فيها كويس لانها بتوضح برضه
لزق القشرة
شكلكوا كده رحرحتوا وفكرتوا اننا خلصنا لا ياباشا لسسسسسسسسه خطوتين اساسيين :
احنا لزقنا الدرفة وش وضهر ولكن لازال اثر الغرا موجود على السطح وشكلها مش انتيكة طب ننضفها ازاى ؟؟؟؟ بنشارة ناعمة اللى بتنزل من قطعيات المناشير طب لو ماعندكش ؟ تنزل اى ورشة نجارة ماكينة يعنى ومعاك شيكارة هتستأذن وتملاها ببلاش . وتروح تحضر صفيحة او حلة وتبل فيها النشارة بميه سخنه ومش لازم سخنه اوى وتبسها كده كأنك هتأكل البط يعنى متكونش مبلولة اوى مبسوسة . وتحط كبشه محترمه على الدرفة وهاتك يا حك وتحك وتحك لغاية ماتحس ان النشارة ابتدت تلزق ارميها وحط غيرها وانزل حكحكة ..... وانا مش مسؤل عن اى حد يبقى حكاك بعد الخطوة دى . ... وورق اللزق بيطلع بالحك ده
خلاص حكينا نشتغل بقى شوية بجد فى خطوة الكشط ودى بتتعمل بمكشطة صلب بتتباع جاهزة ولو عندك منشار قديم مستغنى عنه ممكن تقطعة بالصاروخ وتعمل منه كذا مكشطة بس لازم يكون حرفها مستوى مظبوط وبيتسن على الجلخ زى كستير الفارة كده وبسن مبرد حدادى تكشط نفس السن دا جامد فى اتجاه واحد عمودى على السن بانتظام لغاية ما يتبرطش السن يعنى ايه يتبرطش يعنى ينتنى حرف السن خفيف كده وتحس انه بقى مش قاطع وضوافرك تحوش لو مشيتها على ضهر المكشطة وباينة خطوة السن دى فى الصور وتكشط لقدام يعنى تدفع مش تشد والحرف المايل ناحيتك انت وتميل المكشطة لقدام وانت بتدفعها او تتنيها خفيف من النص هتلاقيه بتاكل طبقة خفيفة من القشرة ويبتدى شكلها يزهزه وتبان الفخامة وبعد كل شوية شغل المكشطة بتحتاج تتسن تانى بنفس الطريقة بالمبرد . بانتهاء الخطوة دى انت خلصت وتقدر تعتبر نفسك بطل الابطال والله يبارك لكم جميعا . مع الصور
اتمنى اشوفكم كلكم لزيقه وحكيكه
