بعض اكواد واعطال التكييف

الفرق بين أنواع الشنيور والهيلتى

ناس كتير عايزه تشتري شنيور ومفك ربط, وناس عايزه شنيور ببطارية ومش قادرين يحددوا أنهي أحسن ويشتروا إيه, البوست ده ممكن يساعد الناس تحدد تجيب إيه والاستخدام إيه
صورة رقم واحد: ده شنيور دقاق, بيقولوا عليه هيلتي مع العلم إن هيلتي دي ماركه, بس ده اسم السوق, الشنيور ده بيركبله بنط معينه اسمها فدية هيلتي "SDS Plus" ميزته إن يشتغل دقاق وعاده, وبنطه سهلة التركيب والفك وبتركب كبس تقاس قوته بالوات, ده بيكون فيه 3 Mode دقاق تكسير, وده ليه بونطه معينه, بيدق مش بيلف, ودقاق مه اللف, وده لما بتكون عايز تخرم في خرسانه أو حيطه قويه, أو لف فقط وده لشغل الخشب والحديد في الغالب

صورة رقم اتنين: ده نفس الشنيور وبيركب عليه ظرف عاده, علشان لو عايز تركب بنط حدادي, وممكن يركب عليه بنط فديه ويشتغل دقاق, لكن مش حيكون بنفس الفاعليه بتاعة بنط SDS
وكمان مش حيتسحمل ضغط جامد, دي بتركب كبس برضه زي البنطه

صورة رقم ثلاثة وأربعة: ده بئه مفك ربط بطارية, قياسات قوته حتلاقوها مكتوبه عليه 150NM , Impact rate 2900 ده مثال طبعًا, المهم ده شغلته ربط وفك المسامير والصواميل الصغيرة, قوته لا تقاس بالوات, طالما بطاريه يبقى بالفولت, في 10 فولت, 12, 18, وهكذا, ده بيكون الظرف بتاعه Hexagonal يعني سداسي, برتكب ليه بنط ربط ليها شكل معين زي ما هوه واضح في الصورة, وليه بنط تخريم كمان, لكن لا يفضل استخدامه في التخريم لأن الميكانيزم بتاعه مختلف شوية عن الشنيور, لأنه بيلف وفي نفس الوقت بيكون في دقاق شغال بس دقاق دائري مش زي الشنيور الهيلتي, "دقات بالجنب" وده ممكن يكسر البونطه, البطاريه بتاعته ليها سعة معينه, 1.5 أمبير, 2 أمبير, 3 وهكذا, كل ما زادت سعة البطاريه كل ما زادت قدرتها على العمل لساعات أطول, يعني مش حيأثر على قوة المفك, بس يخلي البطاريه تشتغل أكثر. ودي صورة للقمة مفك وطقم لقم كامل

صورة رقم خمسة وستة: ده شنيور بطاريه ينفع يشتغل مفك ربط بس مش حيكون كويس, حيبقى ضعيف, ده شنيور عاده, في منه دقاق, بس غالي شويتين, ده بكل بساطه شنيور سرعات حسب قوة الضغط على زرار الباور, وفي Torque Setting اللي هيا الأرقام اللي قدامكم, من 1 إلى 18, طبعًا تختلف من ماركه للتانيه, ده زي ترس كده يزود العزم أو يقلله حسب نوع استخدامك, بيركبله بنط عاده, سواء فديه أو خشابي, مفيد أكثر في الشغل الخفيف, مكتوب عليه عدد السرعات, وتلاحظوا إن ال NM بتاعه قليل, مش معنى كده إنه ضعيف, بس الشنيور مش حيحتاج NM عالي زي مفك الربط, علشان كده بقول ده لا يحل محل التاني, يسند شويه مش أكتر

نقطة أخيرة, قبل ما تشتري وتجري تجيب واحد ببطارية علشان حلو وجميل وشكله ظريف, فكر, إنت محتاجه ببطاريه في إيه؟ السلك حيفرق معاك؟ طيب هل إنت محتاج مفك ربط؟ ولا جايبه علشان عاجبك وخلاص, لو معاك فلوس وعايز تدلع نفسك هات اللي يعجبك, لكن لو الميزانيه محدوده, فكر كويس ونصيحتي ابعد عن اللي ببطاريه علشان الموجود كله نص كم, إما تجيب ماركه غاليه وتدفع ألوف, أو تعمل زيي وتجيب حاجه متوسطه وتشتريها من بره, علشان توازن بين الجوده والسعر, هنا الحاجات دي أسعارها غاليه على الفاضي, علشان كده مش بنصح بيها