كل ماترغب في معرفته عن أشكال بنط الشنيور
الموضع هيكون عن حاجه
أنا بحبها قوي وكل ما أروح محل موان أشتري حاجه, لازم أجيب واحده أي مقاس, لدرجة
إن الموضوع أصبح ملخبط عندي قوي, بنطة الشنيور, في أنواع كتير من البنط, كل بنطه
ليها استخدام, ومفيش واحده تنفع مكان الثانية, الصورة أول صوره دي تجميع شوية
أشكال للبنط, الصور اللي بعد كده كل واحده عليها رقم, عشان نعرف دي أنهي واحده,
عايز أوضح إن مش دي كل أشكال البنط, دي بس الحاجات اللي نحتاجها في الغالب,
وعمومًا أكثر البنط استخدامًا الفدية 6, 8 ونفس النظام للبنط الخشابي/حدادي, كل
بنطه ليها مقاس, 8 مثلاً يعني قطرها 8 ملي, 6 يبقى 6 ملي, 12, يبقى 12 ملي, وهكذا,
ده بيكون حسب حجم الخرم والمسمار اللي ستستخدمه,
دي أشهر بنطه في
العالم, بنطه هيلتي "فديه", دي شغلتها تخرم الحوائط, وتشتغل دقاق في الخرسانة,
لو معاك شنيور شديد وبنطه محترمه, تخرم بيها 1000 متر متقلش لا, دي أكثر البنط
استخدامًا وفي الغالب بنحتاج مقاس 8 أو 6, نادر لو استخدمت مقاس تاني في البيت.
, دي
بنطه خشابي "حدادي" الصورتين 2 و 3 لنفس البنطه ونفس الاستخدام, مع فارق
صغير في قوة التحمل ونوعية الخامة المصنعة منها, في واحده منهم السوداء, دي بتكون
بنطه
Black Oxide
دي كويسه بس ضعيفة نسبيًا، الأقوى منها اللي بتكون صفراء، طبعًا
اللي حقوله ده يمشي على البنطه الغاليه, مش أي بنطه صفراء, الصفراء دي بتكون مكسيه
ب تيتانيوم, بتكون أقوى تستحمل درجات حرارة أعلى, يستخدموا في تخريم الأخشاب
والحديد
دي بئه بنطه عبقريه,
جايبها من بره ومعرفش موجوده هنا ولا لاء, دي بنطه تيتانيوم بجد مش المضروب
بتاعنا, تخرم حديد وخشب وبالجنب تقدر تقطع صاج, أو بمعنى أدق توسع الخرم بسبب
الرسمه اللي زي المنشار اللي على جنبها, علشان أوضح الفارق بين البنطه النضيفه
والمضروبه, البنطه دي خرمت بيها حديد سماكه 3 و 4 سنتي كتير, وحديد محمل, كنت
بختبرها, وبضغط عليها وأسيبها تسخن, واشغل الشنيور على سرعات عاليه, والحمد لله,
لسه حاميه, البنط المضروبه لو سخنت منك أو تقلت عليها شويه تروح منك تبقى
"حافيه"
دي بنطة سيراميك بتكون
زي رأس السهم كده, ومش بتحتاج زومبه علشان تخرم, هيا سنها رفيع وحامي, مش بتجري
على السيراميك, برضه يفضل تكون حاجه نضيفه علشان تشتغل كويس وتعمل خرم نضيف, أنا
جبت بنطه بوش ب 35 جنيه من 4 شهور كده, جميله
البنطه دي برضه من بره
مش عارف موجوده هنا ولا لاء بس أنا مش لاقيها, دي بنطه خشابي سته, الميزه بتاعتها
إنها طويله, تخرم خرم صغير بس تدخل لجوه براحتك, متنفعش للحديد
دي بنطه فديه عاده, بس
طويله, معرفش اسمها إيه, المهم بتركب على ظرف عاده علشان تخرم في الحيطه لمسافه
طويله, دي مقاس 8, برضه استخدامها في البيت نادر شويه
دي بنطه مثقاب
"مفصله", بستخدمها على الشنيور برضه, بس مش مصممه للشنيور, دي بتفرغ
بيها في الخشب تفريغ دائري, مش حتكلم عليها كتير نادر لو حد احتاجها, بس أنا بحبها
قوي وبستخدمها علطول, برضه في مقاسات مختلفه منها
دي برضه بنطه خشب,
معرفش اسمها إيه بالعربي, للأسف أعرف اسم كل حاجه بالانجليزي علشان اتعلمت من
النت, العربي لسه بتعلم, دي للخشب و وليها بوز سن علشان متجريش منك, دي أنضف خرم
يتعمل في الخشب بيكون بالبنطه دي, وبتمشي في الخشب زي السكينه في المهلبيه
في أنواع بنط تانيه عندي أو مش عندي لكن
استخدامها بيكون قليل قوي, مش عايز أتوه الناس معاهم
بنطة بورسلين وسيراميك وخزف
بنطة فرشاة للنضافة، نحاس والومنيوم وحاجة تالتة ناعمة اوي
بنطة كوباية لحفر الجيبسوم بورد
بنطة هولدر لسنون المفك (تركب في الشنيور الأكو)
