بعض اكواد واعطال التكييف

 تجربة شراء ماكينة غسيل سيارات بالضغط

التجربة دى اعتقد انها تهم مالكى السيارات تحديدا و هواة العدد اللى بتساعد فى انجاز المهام بشكل عملى و سريع بشكل عام .

التجربة دى تجربة شراء ماكينة غسيل سيارات بالضغط

.. الشغف و البحث🔍 خد فترة كبيرة معايا و فى خلال الفترة دى اتغيرت الاسعار كتير و اكتر من مرة إلى أن قررت الشراء و كان المعروض امامى سواء على. الانترنت او فى محلات العدد كالاتى :
- ماكينة غسيل بوش Bosch aqt33-11 بقوة ١٣٠٠ وات و ضغط ١١٠ بار و خرطوم بطول ٣ متر و سرعة تدفق ٥,٥ لتر بالدقيقة .. خفيفة و قوية و عملية بسعر ١٩٥٠ تقريبا .
- ماكينة غسيل كارشر Karcher k2 بقوة ١٤٠٠ وات و ضغط ١١٠ بار و خرطوم بطول ٤ متر و سرعة تدفق ٦ لتر بالدقيقة .. قوية و ماركة عالمية و صناعة المانى لكن لا تصلح للاستخدام الشاق كانت وقت ما اشتريت بسعر ٢٤٠٠ و حاليا بسعر ٣٥٠٠ تقريبا .
- ماكينة غسيل بلاك اند ديكر Black&decker Bw1500sp-B5
بقوة ١٥٠٠ وات و ضغط ١٢٠ بار و طول خرطوم ٥,٥ متر و سرعة تدفق ٥,٥ لتر بالدقيقة ماركة محترمة بس معرفش حاجة دقيقة عن اداء الماكينة و بسعر ٣٢٠٠ تقريبا . 

.. نيجى بقى للماركات الصينية المعروفة و منتشرة فى مصر و نبدأ بالآتى : 

* ماركة انجو أو Ingco و منها ثلاث موديلات و هما كالآتى :
- ماكينة بقوة ١٣٠٠ وات و ضغط ١٣٠ بار بسعر ١٣٠٠ تقريبا .
- ماكينة بقوة ١٨٠٠ وات و ضغط ١٥٠ بار بسعر ٢٢٠٠ تقريبا .
- ماكينة بقوة ٢٥٠٠ وات و ضغط ١٦٠ بار بسعر ٣٥٠٠ تقريبا .

* ماركة ايه بى تى APT و منها ثلاث موديلات و هما كالآتى :

- ماكينة بقوة ١٥٠٠ وات و ضغط ٩٠ بار و سرعة تدفق ٦ لتر بسعر ١٢٠٠ تقريبا.
- ماكينة بقوة ٢٥٠٠ وات و ضغط ١٣٠ بار و سرعة تدفق ٦,٥ لتر بسعر ٢٣٠٠ تقريبا.
- ماكينة بقوة ٣٠٠٠ وات و ضغط ١٥٠ بار و سرعة تدفق ٧,٥ لتر بسعر ٣٠٠٠ تقريبا و اعتقد انها تصلح للاستخدام التجارى . 

* ماركة كراون Crown و اللى شوفته منها موديل واحد هو كالاتى :
- ماكينة بقوة ١٨٠٠ وات و ضغط ١١٠ وات و سرعة تدفق ٥,٨ لتر بسعر ١٩٠٠ تقريبا .

... المعروض كتير و فى تنوع و مبدئيا لاحظت أن أسعار الماركات الصينى الشائعة فى مصر زى او اقرب للماركات العالمية اللى معظمها بيصنع فى الصين بس طبعا بجودة الشركة الأم سواء المانى أو انجليزى أو أمريكى الخ ..

.. لذلك استثنيت من الاختيار الماركات الصينى اللى ذكرتها مؤخرا و ده مع كامل احترامى الماركات دى و كمان ممكن يكون فى منها ما هو افضل او اقوى من الماركات العالميه بس للاسف مفيش على اليوتيوب ريڤيوهات أو اعلانات توضح خصائص و قوة المنتجات دى و لا حتى بيانات فنية كاملة تساعد فى الاختيار .

و كان الاختيار مابين( كارشر - بوش - بلاك اند ديكر و سكيل )
و كان اغلى🤑 مافيهم بلاك اند ديكر وتم استبعادها من الاختيارات.

وكمان فى حاجة تانية كنت بدور عليها و ده نظرا لخبرة اكتسبتها أثناء البحث و هى انك تشترى الماكينة اللى مكوناتها الداخلية مصنوعة من الألومنيوم لأنها ميزة بتعبر عن قوة احتمال الماكينة و طول العمر الافتراضي لها و ده اللى عرفته من آراء الناس فى الريڤيوهات و كمان الشركات المصنعة .
و بالتالى تم استبعاد 😞الموديل Karcher k2 و كمان لانى لاحظت أن فى مشكلة او عطل شائع فى الموديل ده تحديدا لكن فى موديلات تانى ممتازة بس الاسعار فلكية

اذا يتبقى بوش بس للاسف كانت غير متوفرة .
و أثناء البحث و الحيرة ⁦🙂ظهرت ماركة جديدة عالمية ومن عمالقة صناعة آلات التنظيف فى العالم و هى Hoover و ماركة هوڤر وهى غنية عن التعريف بس للاسف مفيش فى مصر ماكينات تنظيف بالضغط ماركة هوڨر و بدأت البحث فى الدول العربية على أساس أنها لو متوفرة اشوف حد معرفة فى يشتريها و يشحنهالى لمصر و بالفعل كانت موجودة فى السعودية و الامارات و الكويت و ارخص سعر كان فى الكويت تقريبا و كان للموديل اللى اختارته بسعر ١٩٠٠ تقريبا .
و امكانياتها كالآتى :
موديل الماكينة Power wash 2000
- بقوة ٢٠٠٠ وات
- ضغط ١٤٠ بار
- سرعة تدفق ٧,٥ لتر بالدقيقة
- سرعة تنظيف ٢٥ متر مربع ارضيات🛣️ فى الساعة
- طول خرطوم الضغط ٥ متر
- طول كابل الكهرباء ٥ متر

* محتويات الكرتونة زى ما هتشوفوها فى الصور و هى كالآتى :
- ماكينة الغسيل بارتفاع ٦٥ سم تقريبا .
- خرطوم صغير بطول ٧٠ سم تقريبا مثبت بالماكينة و يستخدم لسحب سائل التنظيف لخلطه بالمياه و له فونيا معينة لكى يتم السحب .
- مسدس الغسيل و يتكون من قطعتين .
- خرطوم الضغط للتوصيل بين المسدس و الماكينة .
- فرشة الغسيل و يتم تركيبها بالمسدس عند الحاجة .
- فوانى الغسيل و لكل منها وظيفة و هى ثلاث فوانى .

..... بعد التجربة لمدة خمسة أشهر تقريبا اداء الماكينة ما شاء الله ممتاز و قوية جدا 💪و ممكن تشتغل لفترة طويلة و ده حصل معايا فى تجربة غسيل السجاد بالمنزل .

- استخدامات الماكينة :
* اساسى طبعا غسيل العربية🚘 و ده بيكون انجاز فى الوقت و المجهود و عدم إهدار للمياه .
* غسيل السجاد و ده ساعدنى فى غسيل حوالى من ١٥ الى ٢٠ سجادة بالمشايات و طبعا ده وفر كتير و دى طبعا خدمة هتفرح بيها والدتك و مراتك و تحسسهم بقيمة العدد اللى انت مضيع فلوسك عليها😉 😀 .
* تنظيف الارضيات .
* غسيل التكييف ⁦❄️⁩و اللى طبعا هيوفر عليك فلوس كتير .
و من ضمن القطع اللى موجوة مع الماكينة قطعة اسمها Turbo nozzle و دى وظيفتها انها تخرج منها المياه بشكل دائرى و بتوصل سرعة دوران المياه لخمسين الف لفة فى الدقيقة بس مينفعش تستخدمها على حاجات فيها دهانات أو كاوتشوك أو نسيج ضعيف لانها ممكن تبوظ كل ده ... و القطعة دة تعتبر من اقوى الاضافات لاى ماكينة غسيل ممكن تشتريها خصوصا و أن سعرها منفردة عالى شوية .
بالنسبة للعيوب اللى قابلتها فى الماكينة :
- الفوانى مصنوعة من البلاستيك .

** على فكرة ماركة هوڤر بتصنع نفس ماكينات الغسيل بتاعتها باسم ماركة تانى اسمها vax ڤاكس و دى معلومة للى حابب يدور على. الماكينة

* الحاجة التانية اللى كان نفسى اشتريها علشان اداء الماكينة يكتمل هى قطعة صناعة الرغوة ( Foam cannon ) و دى قطعة مهمة جدا فى التنظيف و بتركب على المسدس و صورها مرفقة مع باقى الصور .. القطعة دى بقى بتحط فيها سائل التنظيف ( صابون سائل - برسيل جل - شامبو غسيل سيارات ) حسب الحاجة و بكمية لاتقل عن ٣٠٠ مل ( كل ما كمية السائل كانت اكتر من المياه كل ما كانت الرغوة كثيفة ) و بتكمل الباقى مياه و بيخرج منها الصابون على هيئة رغوة كثيفة و ده لو بتغسل العربية مثلا بتغطيها بالفوم و تسيبه دقايق و بعد كده تغسل بالمياه من غير ما ايدك تلمس العربية و اسمه ( touch less cleaning )

.. و بالفعل اشتريتها من Ali Express من ماركة معروفة فى ادوات تنظيف السيارات اسمها MJJC بسعر ٣٧٠ جنيه تقريبا شاملة الجمارك و الشحن و ممكن تبحثوا عنها بالاسم ده .
- على فكرة القطعة دى احيانا بتبقى ملحقة ببعض الماكينات بس بتخرج مياه بصابون (مش رغوة )و ده مش هيساعد فى التنظيف للاسف و ده عن تجربة .