تصليح بوتاجاز
تصليح بوتاجاز
العين أولا ضعيفة مع إنها كبيرة ولو جيت توطيها تطفي تماما
ده غير إنها أول ما تيجي تشغلها تلاقي جزء صغير من العين ولع وتفضل تهش النار كأنك بتهش دبان عشان العين كلها تكمل
اللي حصل ايه وايه حلها
اللي حصل إن النار عشان تشتعل بتبقى محتاجة كمية مناسبة من الغاز مع كمية مناسبة برضه من الهوا (الأكسجين)
فلو كمية الهوا مش متناسبة مع كمية الغاز هتخلي النار تقطع وتبقى ضعيفة
طبعا احنا كلنا عارفين إن الماسورة اللي بتركب في المحبس وبتوصل لحد العين دي اسمها ماسورة الخلط زي اللي في الصورة كده
ماسورة الخلط وظيفتها هي خلط الهوا مع الغاز لانتاج مزيج مناسب لتكوين النار
وبيبقى فيه جزء صغير راكب في أولها من ناحية الفونية وده لما بتلفه بتقدر توسع أو تضيق الفتحات اللي بتدخل الهوا
وطبعا كل ما بتضيق كل ما الهوا بيقل شوية وبيتناسب مع كمية الغاز فتلاقي النار بقت أحسن
عرفتوا السر ولا لسه
طيب انت حاولت تضيق وبرضه نفس المشكلة
يبقى تجيب سلك مواعين ناعم مش خشن
وتقطع حتة صغنونة خالص أد الجنيه المعدن اللي اتعوم ده
وتحشرها داخل الماسورة بس طبعا من بدايتها عشان لو طلعت كبيرة تقدر تخرجها تاني وتقطع منها حتة أصغر لحد ما تلاقي النار اكتملت تماما وبقت أشد ولو جيت توطيها متطفيش
واحد هيقولي عمو عمو مش كده السلك هيتحرق ويبوظ
هقوله ماسورة الخلط مش بتشتعل وإنما وظيفتها بتقتصر على مجرد خلط المكونين آنفي الذكر فقط لا غير
ولو ولعت العين جرب تمسك الماسورة هتلاقيها باردة تماما
وبناء عليه السلك مش هيحصله حاجة
