دوائر التغذية النبضية
SMPS (Switching Mode Power Supply)
دوائر التغذية النبضية
سميت بهذا الأسم لأن المحول التي تعتمد عليه في عملية التحويل من AC الي DC يعمل من خلال التوصيل والفصل بسرعات عاليه ومن هنا جه اسمه انه محول عالي التردد وجاء اسم التغذيه النبضيه أي يحتاج لتوصيل الجهد للملف الابتدائي وفصله بسرعات عاليه تصل الي ٣٠ كيلو هرتز
يعني عشان المحول ده يشتغل ويحول من ٢٢٠ الي الجهد المراد التحويل اليه لازم اكلف حد انه يفضل يحط فيشة الكهربا ويشلها بسرعه كبيرة جدا وده دور المتحكمه(ايسي الباور) الموجوده في الرسمه المتحكمه دي هي الشخص اللي بيوصل الجهد للملف ويفصله عنه بسرعات كبيره جدا عشان نفهم الدائره بشكل عام هنبدأ نتكلم عن كل جزء لواحده أهم حاجه ان عرفنا ان المحول عالي التردد محتاج لوسيله نوصل ليه جهد ونفصله بسرعه كبيره علي عكس المحول العادي
_____________________________________________
أجزاء الدائره
فيوز/ عباره عن سلك موصل ينصهر عند مرور تيار معين يعني اللي معانا ده 1 امبير لو مر أكتر هينصهر السلك ويفصل الدائرة وده نوع من أنواع الحمايه بيستخدم في كتير من الدواير لحمايتها من التيار العالي .
قنطرة التوحيد/ هي المسئول عن التحويل من التيار المتردد إلي التيار المستمر والخارج منها مبيبقاش تيار او جهد مستمر لكن بيبقي حاجه اسمها pulsed Dc .
مكثف التنعيم / هو خاص بتحويل pulsed dc الي تيار مستمر والحقيقه مبيبقاش نقي بنسبة ميه في الميه بيبقي فيه ريبل وكل ما زودت سعة المكثف كل ما قلت الريبل كل ما كان الجهد المستمر أنقي .
المتحكمه / وهي خاصه بتقطيع الجهد المستمر ونركز في حتة مستمر دي يعني المحول ده بيوصله جهد مستمر ع عكس المحول الخطي اللي بيوصله جهد متردد ..المتحكمه هنا بتقوم بتقطيع الجهد عشان يتحول النحيه الثانيه من المحول للجهد المراد .
دايود ومكثف الخرج/ وده خاص بالفلتر لان الجهد الخارج من المحول بيكون عباره عن on/off بتردد عالي جدا فعشان كده بنحط دايود ومكثف عشان المكثف يشحن ويفرغ بسرعه عاليه فيتحول الخرج من on /off الي جهد مستمر يوجد به القليل من الريبل .
Tl431/
عباره عن زينر دايود ولكن قيمته بتتغير بتغير المقاومات اللي بتكون متوصله معاه الفكره منه أيه بقي انه مثلا يكون خرج الدائره اللي معانا خمسه فولت فيكون مظبوط انه يثبت الخمسه فولت فأول ما يوصله خمسه فولت يمرر تيار يروح للابتوكبلر اللي مسئول هنا انه يدي فيدباك للمتحكه ان الامور تمام والجهد المراد مظبوط فالمتحكم متزودش ولا تقلل التردد اللي بتخرجه للمحول طب لوحصل خلل او الجهد قل ميمرش تيار ولا يروح للابتوكبلر اأي اشاره فبتالي المتحكمه تعرف ان في خلل وتبدأ تزود او تقلل التردد علي حسب النظام . وبتتحكم بردوا في جهد الخرج لكن دي عاوزه بوست لوحده خالص
ده بأختصار معلومات عامه عن SMPS