احسب صيانتك بنفسك
بعد كل خير....
★دلوقتي وبعد اتفاقنا ان الصيانه هي المحافظه علي ( حاله ) العربيه الحاليه .. واننا ممكن نخرج اشياء ممكن كانت تشتغل تاني بس بنخرجها عشان انتهاء كيلومتراتها او عمرها وده عشان نأمن من شرها لانها لو باظت فجئه هاتعمل مشكله تكاليف اصلاحها كبيره وهاتضايقنا.. اوكيه..متفقين...
★ الصيانه هي مش ( رفع في امكانيات خالص )..يعني مش هاتحس بالواو ..وابااااا شوفت العصفوره..
مش هاتحس بكده او لو حسيت بكده علميا ده مش صحيح يعني حضرتك مش هاتاخد من الصيانه دي واحد هورس باور زياده مثلا....كل ماهنالك انك نسيت اداء عربيتك سابقا وهي جديده ولما بتعمل الصيانه بيرجعلها جزء من ادائها السابق فا حضرتك بتحس بفرق... اوكيه.. متفقين....
★كل الصيانات مبنيه علي بعضها.. يعني دايما بنرجع لاخر صيانه اتعملت او لو كانت من الزيرو بنعرف اتعمل فيها ايه
★ حسبه سهله ..هاقولك عليها وهي كالتالي.. ولو عملتها اوعدك شخصيا عربيتك تعيش العمر كله بدون مشاكل.
صيانت عربياتنا بتتعمل تقديريا كل ٢٠ الف كيلو
بوجيهات وفلتر بنزين فلتر هوا .
وال ٢٠ اللي بعدها بكده عربيتك عملت ٤٠ الف فا بتكون كالتالي
بوجيهات وفلتر بنزين فلتر هوا + سير باور سير دينامو سير تكييف تيل فرامل.
وال ٢٠ الف اللي بعدها كده عربيتك عملت ٦٠ الف
بوجيهات فلتر بنزين فلتر هوا سير كاتينه + البليتين وبنخلي ال ٣ سيور القدام بيركبم بتاني عشان دول بيقعدم ٤٠ الف.
وبنكرر كل ما سبق.....ولكن في قاعده لاغيه لما سبق وهي مرور ال ٣ سنوات علي موديل العربيه...
ال ٣ سنوات دول بنحسبهم دايما صيانه كبيره لوحدهم وبنغير سيور وفلاتر وكاتينه فيهم
يعني يا كيلوهات تمر..او ٣ سنين تمر.... ايهم اقرب
★★★★★★★★★★★★★★★★★★★★★★
★ يعني لو حد سألني عاوز اعمل صيانه ال ١٥ الف..اقوله موديل عربيتك ايه ولو كان عدي ال ٣ سنين عليها..بكده صيانته هاتكون كاتينه فيها... لان مر ٣ سنوات علي السير..كده وصلت.....
ملخص صيانات..
يا مرور ٣ سنين يا مرور ٦٠ الف كيلو ايهم اقرب للكاتينه والبلي.
صيانتك كل ٢٠ الف فقط لا غير
بنكرر صيانه ال ٢٠ الف مع كل صيانه دايما
ال ٣ سيور بيتغيرم كل ٤٠ الف كيلو
★طبعا تغييره الزيت حسب استهلاكك ..ولكن يفضل ما تقعدش الزيت في الموتور ( سنه ) ..
يعني لو حضرتك استهلاكك قليل كيلوهات وماكملتش ال ١٠ تلاف في السنه.. وكنت حضرتك حاطت زيت ال ١٠ تلاف... حضرتك هاتنزل الزيت ده بعد مرور سنه حتي لو كنت حضرتك عملت بيه ٣ الاف كيلو بس. ( انا با قول يفضل ).. حضرتك عاوز تعصره تطلع بطيخ دي حريتك...
★الصيانه = حياه ..يعني لو لاقدر الله ما اتعملتش ممكن ...... يعني العربيه تعطل ف حته بعيده عن اهلك وناسك وتتعرض لمشاكل...
★موضوع تغيير مايه الريدياتير في نفس اهميه تغيير سير الكاتينه والحفاظ علي الموتور..
★موضوع انها دايما ماتصديش ده مهم جداا عشان حضرتك ما تجيبش لموتورك جوان وش السلندر
★حضرتك حط اي نوع مايه تتخيله ف حياتك ولكن حافظ عليه من الصداء
★حضرتك حط زيت موتور مناسب وماتتأخرش عليه فالغيار
★حضرتك تسوق علي سفر بين ١٠٠-١١٠ كيلو متر ساعه مع التكييف اوعدك عربيتك ما تسخنش منك ابدا..
★حضرتك كل يوم صباحا تدور عربتك باشا وتصبر من ٢ ل ٣ دقايق تسخين ..اوعدك مايكونش في مشاكل كستبانات وهاتحافظ علي موتورك لمده اطول.
ملحوظه...!!
((( مش ها ادخل في جدال مع اي حد يسألني عن نوع زيت او مايه او تسخين العربيه من عدمه))) لاني با اتكلم في المجمل..با اتكلم الصيانه عموما... وسبق واتكلمنا مليون مره عن انواع زيوت وسوائل تبريد واتكلمنا عن فوائد التسخين صباحا .... وبردو هاريح الناس اللي مش عاجبهم حاجه وماشوفناش منهم اي حاجه مفيده غير احباطات وسلبيات ونقاشات تخرجنا عن هدفنا ( لك ان تفعل ولك ان لا تفعل )
★العفشه ...
والله قتلت ( بضم حرف ال ق ) بحثا ونقاشا..
ولكن هاقولك صيانتها ايه
مش كل شويه تربط عفشه ..ماترحش لعفشجي غير لما تسمع صوت ..(( تابع في مليون بوست )) بيتكلم عنها
الفيرنا جميله..
لو هاتصونها...هاتصونك.. ها تهينها ..هاتكرهك فيها.
ارجوك راجع البوست ده تاني والله فيه خلاصه معلوماتي وفي اجابه عن كل انواع الصيانه بتاعتنا
حتي لو حضرتك عدادك عامل ٥٠٠.٠٠٠ كيلو هاتعرف تحسب الصيانه بتاعتك..
