بوست قوي جدا محتاج فنجان بن ساده فاتح علي الريحه.
كتيب التعليمات قايل
ان كميه زيت الموتور بدون فلتر هي #3.00 لترات.
وان كميه زيت الموتور بالفلتر هي 3.300 لترات.
انا باقولك اننا ممكن نستعمل من 3.5 ل 4 لترات عادي ولا ضرر ( بحكم التجربه سنين قياده وتعامل وتجربه علي ارض الواقع )
في حالات معينه خطر وهي ( زياده عن كده ب كيلو مثلا )
في الحاله دي طلمبه الزيت مش هاتلاقي #فراغ تعرف تتنفس منه وبتالي الكميه الزياده ( الكيلو الزياده بعد ال 4 لتر ) دي هاتأثر علي كفائتها في #رفع الزيت..
وبالتالي هايضرب فورا من اي مكان ضعيف في جسم الموتور زي اولسيهات ( احكام عدم خروج الزيت في الاماكن المتحركه)
او يضرب علطول في جوان التاكيهات والمصيبه لو كان بلف بخر الزيت مسدود يعني انت بتعمل ضغط داخلي وحش في الموتور تأثيره هايكون سلبي علي كل حاجه..شنبر وبخره وعوادم بتوصل للون الازرق والاسود..يعني كوارث...
ولكن الاصح ( هو 3.5 لترات )...
نقول تاني..عادي استخدامك الجركن كله ال 4 لتر..ولكن الاصح هو 3.5... والاصح الاصح حسب الكتاب هو 3.300 ثلاثه لتر و 300 ميللي بس ماحدش بيعمل كده...
وصلت المعلومه ?!
الحاجه الاخيره..لو الزيت نقص بعد مده استخدام ( 100 او 200 ميللي مثلا ) يمكن تكملتها عادي جدا من نفس نوع الزيت لل F واكمل مده الزيت ..لو كان ال 10.000 او ال 5000 عادي جدا.. في نسبه بخر للزيت بتختلف من نوع والتاني...
معلومه تانيه.. المسافه بين حرف ال F وحرف ال L هي ( لتر زيت فقط ) ..نقول تاني..لتر زيت 👉.. يعني ماتتخضش..
تكشف بنفسك علي الزيت
دور العربيه ووصل المؤشر بتاع الحراره للمنتصف..واطفي العربيه
اصبر حوالي دقيقتين مثلا..
خرج المقياس ( امسح الزيت )
دخل المقياس وارفعه وبص بعينك وصل الزيت لفين..
القصه دي حضرتك بتتعمل كل 3 او 4 ايام استخدام..عادي جداا صباحا او بعد مشوار....علي ( ارض مستويه )..👉.
استعمل الزيت المناسب ( لبيئه ) تحرك العربيه..
لو كان تحركاتها شاقه جداا وفي اماكن متربه وبتحمل حراره
( انا ) با انصح ب استخدام اي زيت معدني كامل ايا كان نوع الشركه اللي هو رقمه 20w50. حتي لو كان عداد العربيه صغير..
( التوكيل ) بيقول استعمل الزيت الخفيف جدا للعربيات الجديده ولكن في ( بيئه العمل اللي انا ذكرتها سابقا حصل منه مشاكل علي ارض الواقع ) ..ولك ان تفعل ولك ان لا تفعل ( انت حر )👉..
لو حضرتك مش بتستعمل العربيه كتير ومش بتكمل كيلوهات الزيت..في السنه...انصح بإستخدام بردو الزيت المعدني 20w50 لان حضرتك كده كده هاترمي الزيت بعد 9 او 10 شهور استخدام وركنه داخل الموتور وده لمصلحته...
والله حضرتك غني ومعاك تجيب الزيت اوب 700 جنيه التخليقي الكامل 5w20 وتحطه وتمشي بيه 2000 كيلو وترميه بعد سنه..دي حريتك...
فهمتني 👉👉👉👉.
شباب..الحفظ وتطبيق بعض الحاجات كده حرفيا سعات بيكون غير مناسب لكل الناس..
لا ده انا اشغل مخي شويه..واعرف ان الزيت للتليين والتبريد والتنظيف... واختار الزيت اللي علي مزاجي حسب طبيعه عملي..
